إعـــــــلان

تقليص
لا يوجد إعلان حتى الآن.

أجمل السامريات المغناة بالخليج .

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة

  • أجمل السامريات المغناة بالخليج .

    (( أجمل السامريات المغناة بالخليج ))

    انا البارحه يوم العرب رقدوا ونيت
    وكن الحشى تشغل بوسطه لواهيبي
    على اللي بحبه وبسط قلبي بناله بيت
    وقفل على سر الهوى بالدواليبي
    ويا بو حمد كانك على بيتهم مريت
    اذا شفت سيد البيض زين الرعابيبي
    قلت تراه اخطا وانا مثبتن ما خطيت
    واخطا على يوم اصرت بالمواجيبي
    وانا ارسلت لك جملة مكاتيب ما رديت
    ويالله عسى منتب على البعد ناويبي
    تخالف علي جيراننا يحسبوني ميت
    وهم ما دروا ان الحب له دربن صعيبي

    كلمات بشير شنان


    ======


    ناح الحمام

    ناح الحمـام بعاليات المقاصيـر ::: واهل الهوى طربين مـا يسمعونـه
    ذكرتني يا الورق لا ذكرك خير ::: غرو كما لـدن المطـارق قرونـه
    علام ما كم ضايع ياهـل الحيـر::: نبـي نعدلـه كــان ماتعدلـونـه
    ما هي حمية ساقني نيـة الخير :::والشرط ما نبغيـه لـو تشرطونـه
    الا ان حصل راعي النهودالمزابير::: هز ومـز وكرعـة فـي سنونـه
    باكر ضحى العيد لا طقوا الزير::: ما عندهـم مـن غالـي يلبسونـه
    انـا وخلـي فرقتـنا المقـاديـر::: يا من خبط بيديه واعمـى عيونـه
    يا شاعقين النـار جاكم مساييـر::: ضو سناها يجـذب اللـي يجونـه
    يا مال تفاق شفـوق على الطير ::: ومحنـش مـن بعـد ذا يذكرونـه
    والا ف (حر) ما لوى رجله السير::: بالوكر طـلاب العشـا يحترونـه
    يظهرعشيري كالخلاصة من الكير ::: اعيذه بـرب الناس لا ينحتونـه
    تصبح عروق القلب عندي معاشير::: ويزهر ثمر قلبي وتطرخ غصونـه

    عبيد العلي الرشيد



    ======



    هل الطايف

    اذكر هل الطايف عسى الطايف السيل ::: عسى السحايب كل يـوم تعله
    ذكرى الليالي الماضية والتعاليل ::: عليـه دمـع العيـن دايـم تهـله
    ترى الشقـا كل العنا والغرابيل ::: فرقـا الحبيب اللي تنكر لخله
    عليه دمـع العيـن مثـل الهماليـل ::: والـى ضواه الليل ياعبرة لـه
    اشكي عليك الحال عسر المداخيل ::: يخفي دموع العيـن لاينفطـن لـه
    لاعـاد لاحيلـة ولابـه مراسيـل ::: مشكل غـرام الحب يامـن يحله
    بلواك ياراعـي العيـون المظاليل ::: اللي خذيت الزيـن والملح كلـه

    للشاعر: سليمان بن حاذور

    ======

    يا من باس العريّس -- يا من باسها يا من باسها
    يا من سطر اللولو -- على راسها على راسها
    جابوا لها القبقب -- و قالو البسي و قالوا البسي
    و قالت ما البسه -- ولا يهمني ولا يهمني
    ولا يهمني الا خوي --زين الشباب زين الشباب
    و عنده قلم فضه -- و يكتب كتاب و يكتب كتاب
    و عنده عروس له -- على ركبته على ركبته
    و يمسح بسايلها -- حباب حباب حباب حباب

    ======

    متى تشوف العين من تهوا.. متى تشوف العين غاليها
    متى ألتقي به و أستمع نجواه .. و آخذ من اللحظات غاليها
    متى على الله نجتمع وياه .. الأفراح ما تقصر لياليها
    يا عين هللي والسبب فرقاه .. فرقاه نارٍ ذقت صاليها
    لو طالت الأيام أنا ما انساه .. أرضي عسى تسوى تواليها

    ======

    معذور راعي الهوى معذور – لمته و عذره عقب ما جاني
    جاني مصايب و شرب كدور – من ليعة الصد والهجراني
    خطير اهوبي بغير شعور – كانه جرحني ولا داواني
    ان قلت راعي الهوى مسحور – بلاه من لفتة الغزلاني
    يبلش به العارف الدكتور- جرح الهوى ما خلصه لقماني
    حال السعادة و يوم سرور – ان ما تعنيت جاني عاني
    هذاك يبغي فرح و نشور – صدري بصدره على الرماني
    ادعج عنج ما يبي حيمور – مصبوغ من صبغة الرحماني
    يالله حاميتك درع و سور – عن زيغة النفس و الشيطاني

    سلطان بن فرزان السهلي

    ======

    ألا ياهل الهوى واعز تالي – عديل الروح مكن في صوابه
    عشير بالمحبة سم حالي – وانا واحسرتي قلبي غدا به
    هني ياللي ينامون الليالي – و قلبي ما طرقهم مثل مابه
    اغبط اللي من الحب صار خالي – و انا قلبي شقي واعذابه
    امير السمر مادري وش نوى لي – ألا يا الله تعتق لي شبابه
    أخذ روحي ولاني عنه سالي – و انا و ان راح عمري واسفابه
    حشا ما غاب عن ذهني و بالي – ولا ساعه ما حسب في حسابه
    انا لي باسم حرف النون غالي – واخذت منه خظابه والتوابه

    غناء :عبدالله فضاله

    ======

    سلمولي على اللي بذكرهم ولعوني .. كامل الزين سيدي منزله بالدعيه
    ولعوني بحبه و ما تشوفه عيوني .. بالحشا نور عيني باني له بنيه
    ليتني خاتم له و عبد هم يشتروني .. اتهنى بشوفه كل صباح و مسية
    كود جرح الموده عقب وصله يهوني .. منوة القلب ريم العين صافي الدرية
    كان سيد العذارا عن هواه ابعدوني .. الله اقوى حياتي مع مماتي سويه
    ياحسين الحلايا ما تريح شجوني .. دايم قلبي مشغول و عيني شجية
    ما تداري عليل من حياته ظنوني .. يرتجي ليل بحضنك قبل كاس المنية
    سلمولي على اللي بذكرهم ولعوني.. كامل الزين سيدي منزله بالدعيه

    غناء :عايشه المرطه

    ======

    يا زين أخذت قلوبنا وياك – أمس العصر يومك تحرانا
    حنا عرفنا غايتك و مناك – قصدك تولعنا و تهوانا
    يا يا قبلة الله يا حلو ملقاك – زولك الى شفناه سلانا
    طعم العسل من مبسمك و شفاك – طعم العسل من ريقك أشفانا
    لولاك ما دسنا الخطر لولاك – لولاك ما كثرت خطايانا
    ماهي مروه كل ما جيناك – وشلك تولعنا و تجفانا
    يا هايف الخصرين وشدراك – ضحكك بسنك حرق احشانا
    نصبر على هضمك ولا يخفاك – يجفاك ربك حين تنسانا

    عبد المحسن عثمان الهزاني

    ======

    يا علي صحت بالصوت الرفيع --- يا مره لا تذبين الجناع
    نشتري يا علي كانك تبيع --- بالعمر مير ماظني تباع
    شاقني يا علي قمرا وربيع --- يوم انا آمر و كل أمري مطاع
    يوم أهلنا و أهل مي جميع --- نازلين على جــال الرفاع
    ضحكتي بينهم وانا رضيع --- ما سوت بكييتي يوم الوداع
    طوعوني وانا ماكنت أطيع --- وغلبوني وانا ظفر شجاع
    وانت يا لايمي جعلك تضيع --- ما تماري بها مثل الشعاع

    بن لعبون

    =====

    ياهل الشرق مروا بي على القيصيرية **عضدوا لي وتلقون الأجر والثوابي
    واطلبوا دخترالعشاق يكشف عليه ** بس يمسح على قلبي و يبرى صوابي
    يا غريب لفانا من ديار مدية ** الغريب الهله وأنـا علي العذابي
    كود يرفي جروح بالضماير خفيه ** من رفا جرح مسلم فاز يوم الحسابي
    وهقوني بعرفه ناجلين الخطية ** مثل ما وهق العطشان ضوح السرابي
    في عيونه سحر هاروت دمث الشفية **سحروني وانا بيني وبينه حجابي
    أتحرى مراحه و أتحرى مجيه **واستخيل البروق اللي بليا سحابي

    فهد راشد بورسلي

    ======

    البارحة عيني جزت ياسعود --- والبال دايم عند مظنونة
    لاهو مجافيني ولا مطرود --- ماله عذر والناس يغلونه
    ان كان قصده ناوي بصدود --- اطلب من الخلان يرضونه
    يابو بدر يا زين فن العود --- لا صار ثنتين يردونه
    أفرح الى دق الوتر داوود --- لا شال فنه ما تملونه
    يالله ياللي بالسما معبود --- تستر على اللي ما يعرفونه

    الشيخ أحمد الجابر

    ======

    ياهل الشرق مروا بي على القيصيرية --عضدوا لي وتلقون الأجر والثوابي
    واطلبوا دختر العشاق يكشف عليه -- بس يمسح على قلبي و يبرى صوابي
    يا غريـب لفانا من ديار مدية -- الغريب الهله وأنـا علي الــعذابي
    كود يرفي جروح بالضماير خفيـــه -- من رفا جرح مسلم فاز يوم الحسابي
    وهقوني بعرفه ناجلين الخطية -- مثل ما وهق العطشان ضوح السرابي
    في عيونه سحر هاروت دمث الشفية -- سحروني وانا بيني وبينه حجابي
    أتحرى مراحـه و أتحرى مجية -- واستخيل البروق اللي بليا سحابي
    فهد راشد بورسلي

    ^
    ^
    ^
    التعديل الأخير تم بواسطة * لـحظة سـكون *; الساعة 22-06-2011, 10:48 PM.

  • #2
    ياحبيبي حكمت و خل حكمك عدال
    سوّ بي ما تشا وافعل على ما تريد
    الله اللي عطاك و صوّرك بالجمال
    فــارق بالبها والملح فرق بعيد
    من تحبي راس ماله ما يبي راس مال
    ان حيا جنته وان مات يكتب شهيد
    ياليت من ينهبه ياسعود ذاك الغزال
    ثم يزبن عليهم مثل زبنة رشيد
    آه من فات عمره ماهتنى بالوصال
    راح عمري بلاش و عشت عيشة شريد
    جل من صوّرك و كمّلك بالكمال
    أشهد اللي ينالك ذاك حظه سعيد
    حسين البهــا ما عاد فيّ احتمال
    باح صبري و حبـــك كل يوم يزيد
    ساهرات عيوني فيك طول الليــال
    باكي واتذلل كود فيكم يفيد

    منصور المفقاعي


    ======


    البارحة يوم العباد رقـود *** ياناس خلوني على فالـي
    مجروح روح وخاطري ملهود *** اي والله ابكي صاحب غالي
    تبكي عيوني والدموع شهود *** إرفق بحالي يابعد حالـي
    يازين مالك من عذابـي زود *** ودي ولكـن ما تهيـّا لـي
    ودي بوصلك يانعيم العـود *** من قبل أعرفه خاطري سالي
    اللي ذبحني بالعين الســود *** والله فلا أسمع هرج عذالـي
    ترى المحبه مابها منقـــود *** ومنين ماهـب الهوى مـالي
    يا عود ريحان عليـه ورود *** يطفي بعض همي وغربالي
    هبي بريحه ياهبوب النـود *** ماهي سوالف على الخـالي
    الحب يذبح والشقا محـدود *** زولك يورّا لي ويرا لـي

    احمد الناصر

    ======

    يوم الأثنين الضحى شفت لي غروٍ عجيب -- تحسب انها حققت بي وانا ماشوفها
    لا سقى الله سدرةٍ غصنها غصن رطيب --حدرها شقر الذوايب تفل زلوفها
    يا ثلاثٍ بينهن شاقني مهرٍ عريب -- باد حيلي يوم قفت تتل ردوفها
    أحمرٍ نفنوفها والعباة من الكريب --- ما تميّز صبغة الساق من نفنوفها
    شالها عصر الصبا والغذا بيض و حليب -- لو تجيس الورد يا سعود ضر كفوفها
    ما تعنت للحطب والرشا فوق الجليب -- دايمٍ مخدومه والعبيد تحوفها
    علة الفنطاس ما يبتصر فيها الطبيب -- من عيون بالمخازر تسل سيوفها

    فهد راشد بورسلي

    ======


    لولا الرجاء واعلل القلب بوعـود *** وهو الوحيد اللي عشقته عشـاقه
    لولاه ماعودت نفسي على الكود *** ماغيره أحد من المخاليق شاقه
    اختار قلبي بالهوى ناعم العـود *** زين القوام أشباه وجهه دقاقــه
    طـفل عليه من البها ستر وعقود *** وفراق روحي من سبايب فراقـه
    يانـاس حبي له بلا سلم وحدود *** وإن غاب هلّت دمعتي من فراقه

    محمد الاحمد السديري

    ======

    يالعين هللي صافي الدمع هلليه --- واذا قضى صافيه هاتي سريبه
    يالعين شوفي زرع خلك وراعيه --- هذي معاويده و هذي قليبه
    من أولٍ خللي قريب و نرجيه --- واليوم جيتهم علينا تعيبه
    يمرني بالسوق ماعاد احاكيه --- يا كبرها يا عبرها من مصيبه
    اللي يبينا عيّت النفس تبغيه --- واللي نبيه عيه البخت لا يجيبة

    نوره الحوشان


    ======


    حمام يا اللي على روس المباني --- ذكرتني مغرم روحه شجية
    ذكرتني جادل حبه سباني --- مدعوج الأعيان مردوع الشفية
    لا نبة منه ولا خط لفاني --- وين أتصبر و هو يطري عليه
    زول المها صد عني من زمان --- وش في يديني على جالي الثنية
    يا ناس راعي المودة ما يداني --- ما يبكي الا من جروح خفية
    بس من اللوم جاني ما كفاني --- معذور يا راعي النفس الخلية

    منصور الخرقاوي


    ======

    يا بو فهد مني غدا الشوق ويلاه--- والشوق لي منه غدا من يجيبه
    خلي عزيز وكيف أنا اليوم أبسلاه--- تدري ترى الفرقا شديدة و صعيبه
    وش حيلة اللي ضيّع الشوق عقله--- يا فرقة الخلان ياهي مصيبـة
    صد الخليل و جايد اليوم ملقاه--- من سبب الفرقا عسى الله حسيبه
    اللي حرمني مزة من شـفاياه--- جعله عليل و ما يحصل طبيبه
    خلي من الخضرات ما شفت حلياه--- هو سلوة المحزون وغيره شبي به


    ^
    ^
    التعديل الأخير تم بواسطة * لـحظة سـكون *; الساعة 22-06-2011, 10:42 PM.

    تعليق


    • #3
      الله يعطيج العافية أختي لحظة سكون على ما كتبتيه
      تسلمين

      تعليق

      يعمل...
      X